मुंबई : ‘बेस्ट’ (BEST) कर्मचाऱ्यांची दिवाळीही आता गोड होणार आहे. मुंबईच्या महापौर किशोरी पेडणेकर यांनी बेस्टच्या कर्मचारी आणि अधिकारी यांच्या साठी बोनस ची घोषणा केली आहे. ‘बेस्ट’ कर्मचाऱ्यांना दहा हजार शंभर रुपयांचा बोनस मिळणार आहे.
बृहन्मुंबई महापालिकेकडून दोन दिवसांपूर्वीच अधिकारी आणि कर्मचाऱ्यांना 15 हजार 500 रुपये बोनस जाहीर झाला. त्यानंतर ‘बेस्ट’च्या कर्मचाऱ्यांनीही बोनससाठी आक्रमक भूमिका घेतली होती. त्यानंतर महापौर किशोरी पेडणेकर यांनी बेस्ट अधिकारी आणि कर्मचाऱ्यांना प्रत्येकी 10 हजार 100 रुपये इतके सानुग्रह अनुदान जाहीर केले.
बृहन्मुंबई महानगरपालिका अधिकारी, कर्मचाऱ्यांच्या धर्तीवर बेस्टमधील अधिकारी आणि कर्मचाऱ्यांना सानुग्रह अनुदान मिळावे यासाठी मुख्यमंत्री उद्धव ठाकरे यांच्या उपस्थितीत तीन नोव्हेंबर 2020 रोजी वर्षा निवासस्थानी बैठक झाली. या बैठकीत बेस्टच्या कर्मचारी युनियनसोबत सकारात्मक चर्चा झाली होती.
