ठाणे अनेक ठिकाणी जलमय
ठाणे :
ठाणे जिल्ह्यात शनिवारी सकळापासूनच जोरदार पाऊस कोसळला. मागील २४ तासांत जिल्ह्यात १२४.५६ मिमी पाऊस पडल्याची नोंद झाली. तर ठाणे शहर परिसरात संध्याकाळपर्यंत सर्वाधिक १२०.६८ मि.मी. पाऊस पडला. दिवसभरात ठाणे शहरात १२ ठिकाणी पाणी साचले होते. मात्र, लॉकडाऊनमुळे नागरिकांनी घरातच राहणे पसंत केल्याने घराबाहेरील जनजीवनावर या पावसाचा फारसा परिणाम जाणवला नाही.
सकाळी मानकोलीजवळ बस आणि कारचा अपघात झाल्याने मुंबई -नाशिक महामार्गावर वाहतूककोंडी झाली होती. तर मुसळधार पावसामुळे ठाणे आणि कळवा स्थानकातील रूळ पाण्याखाली गेल्याने आपत्कालीन सेवांसाठी सुरू असलेली लोकल सेवा विस्कळीत झाली होती. जिल्ह्यात ठाण्यासह कल्याण-डोंबिवली आणि ग्रामीण भागात वृक्ष उन्मळून पडल्याच्या घटना घडल्या. एक-दोन ठिकाणी भिंतीही पडल्याच्या घटना घडल्या. हाजुरी येथील भींत कोसळल्यामुळे नागरिकांत भीतीचे वातावरण होते. तीन पेट्रोल पंप जवळील रेड क्रॉस रुग्णालय परिसरात पाणी साचल्यामुळे वाहतुकीला अडथळा निर्माण झाला होता.
