ठाण्यातील काशिश पार्क येथे शिवसेनेच्या वतीने मोफत कोविड चाचणी शिबिराचे आयोजन
ठाणे
ठाणे मनपा क्षेत्रातील कोरोनाचा वाढता प्रादुर्भाव नियंत्रणात आणण्यासाठी पालकमंत्री एकनाथ शिंदे व महापौर नरेश म्हस्के यांच्या संकल्पनेतून व नगरसेवक विकास रेपाळे व वृक्षप्राधिकरण समिती सदस्य नम्रता भोसले- जाधव यांच्या वतीने ठाणे महापालिका प्रभाग क्र. १९च्या नागरिकांसाठी “मिशन झिरो” मोहिमेअंतर्गत मोफत कोविड चाचणी ( स्वॅब टेस्ट) शिबिराचे आयोजन रविवारी करण्यात आले होते.
मुख्यमंत्री उद्धवजी ठाकरे यांच्या वाढदिवसाचे औचित्य साधून शिवसेना प्रभाग क्र १९ व सबर्बन डायग्नोस्टिक सेंटर यांच्या संयुक्त विद्यमाने ठाण्यातील काशिश पार्क येथे रविवारी आयोजित करण्यात आलेल्या या शिबिराला नागरिकांनी उदंड प्रतिसाद दिला.यामध्ये केशरी व पिवळ्या रेशन कार्ड धारकांची मोफत तपासणी करण्यात आली तसेच घरकाम करणाऱ्या महिला,सफाई कर्मचारी व इमारतीचे वाचमन यांची देखील मोफत कोविड चाचणी करण्यात आली .कोरोनाची साकळी तोडण्यासाठी प्रभागात विविध ठिकाणी शिबीर आयोजित करण्यात आले आहे यामध्ये सोमवार २७ जुलै रोजी ठामपा शाळा क्र-१८ परबवाडी, मंगळवार २८ जुलै रोजी रघुनाथ नगर शाखा येथे सकाळी १० ते २ यादरम्यान सदर शिबिरांचे आयोजन केले आहे . तरी ज्या व्यक्तीस सर्दी, खोकला, ताप, अंगदुखी अशी कोरोनाची प्राथमिक लक्षणे आढळून आल्यास तातडीने त्यांनी विनामूल्य चाचणी करून घ्यावी व आम्हांस कोरोनाचा प्रादुर्भाव रोखण्यास सहकार्य करावे असे आव्हान स्थानिक नगरसेवक विकास कृष्णा रेपाळे व वृक्षप्राधिकरण समिती सदस्य नम्रता भोसले-जाधव यांनी केले आहे.
