अहवाल येण्यापूर्वीच मृतदेह नातेवाईकांच्या ताब्यात
ठामपा रुग्णालयाचा भोंगळ कारभार चव्हाट्यावर
ठाणे
ठामपाच्या कळव्यातील छत्रपती शिवाजी महाराज रुग्णालयाने हनुमाननगर येथील एका नागरिकाचा मृतदेह कोरोनाचा अहवाल येण्यापूर्वीच नातेवाइकांच्या स्वाधीन केला. मात्र त्या मृत ५० वर्षीय नागरिकाचा अहवाल पॉझिटीव्ह आला आहे. त्याच्या अंत्ययात्रेत अनेक नातेवाइकांनी स्मशानभूमीत गर्दी केली होती. त्या सर्वांची शोध मोहीम आता सुरू झाली आहे. अशा प्रकारची आतापर्यंत ही तिसरी घटना आहे.
हनुमाननगर भागातील या व्यक्तीस हृदयविकाराचा झटका आल्याने त्याचा एप्रिलच्या शेवटच्या आठवड्यात कळवा रुग्णालयात दाखल केले होते. परंतु, ३० एप्रिलला त्याचा मृत्यू झाला. या कालावधीत त्याची कोरोना चाचणीही केली होती. परंतु, अहवाल येण्यापूर्वीच रुग्णालयाने त्याचा मृतदेह नातेवाइकांच्या स्वाधीन केला. मात्र, रविवारी त्याचा कोरोनाचा अहवाल पॉझिटिव्ह आला आहे. सदरचे प्रकरण अतिशय गंभीर असून या प्रकरणाची सखोल चौकशी करून संबंधितांवर कारवाई झाली पाहिजे. अशी मागणी ठाणेकर करीत आहेत.
